Tysdag til torsdag førre veke samlast 16 born og unge til sommarkurset UngLåt på Sunnfjord Folkehøgskule. I år fekk vi til og med Vegard Hansen til å halde toradarkurs for ei gruppe. Det er altså fyrste gong at det har vore arrangert toradarkurs på UngLåt. Elles var Lars Fivelstad Smaaberg med å leia leik, quiz og danseøkter til alle på kurset. Arngunn Timenes Bell og Erlend Viken heldt kvart sitt kurs på hardingfele. Ragna Valde Sletten lærte vekk slåttar på vanleg fele, og Kristina Bjørdal heldt kurs på trekkspel.
UngLåtdeltakarane fekk lære slåttar og teknikkar i grupper og enkeltvis, spele fellesnummer i eit stort lag, førebu ein konsert gjennom pynting, rigging, presentasjon av gruppene og slåttar, skilting og meir.
I tillegg til kurs, var det òg duka for visning av fotballkamp mellom Noreg og Elfenbenskysten på storskjerm! Lars heldt ein lang og artig quiz på onsdagen med spørsmål om VM, området rundt Førde, folkemusikk og folkedans og instrukørane. På skulen fekk alle fri tilgong på brettspel, pingpong, biljard, fussball og ein heil gymssal. Hadde det vore litt betre veir, er der òg eit uteområde som godt kunne vore nytta masse! Folkehøgskulen, som om sommaren vert om til eit hotell, serverte god mat alle dagar, til og med is!
Sjølve UngLåtkonserten føregjekk på scena i gymssalen, dvs at publikum òg sat på scena med sceneteppet trukket for. Dermed vart det ei meir intim konsert for dei oppmøtte. Elles var konserten heilt deltakarstyrt, med dyktige konfransierar som losa publikum gjennom! Etter konserten var nokre av deltakarane att for å sjå opningskonserten ilag gratis gjennom UngLåt. Dei fekk oppleve folkemusikk frå heile verda, inkludert Erlend Viken som spelte saman med Håkon Høgemo til Vilde Westeng som dansa.
Sjølv om det var ein mindre gjeng i år, har det vore eit kjekt og lærerikt kurs der deltakarane fekk god oppfølgjing i gruppene. Vi vil takke Musikkens studieforbund, Sparebankstiftinga Sogn og Fjordane, Vestland fylkeskommune, Norsk senter for folkemusikk og folkedans og Sparebanken Norge for økonomisk støtte. Vi vil òg takke alle frivillige som hjalp til under kurset, det gode laget av instruktørar vi hadde med oss, Førdefestivalen for samarbeidet og ikkje minst den utruleg kjekke gjengen som deltok på UngLåt 2026!
